بقلم الشاعر /د. جاسم محمد الحساني
دفّینی إبحبّک دفّینی
أینک ، أینک ، یصبی عینی ، أینک ، أینک ، شو ناسینی
لا من طارش لا مرسال ، بغیابک دهورت الحال
مرّتنی أیّام إبهل غربه ، و إعیونی إعلی إصورّک تربه
عایش وحدی إبدونک صعبه ، منتظرک دوم إمخلّینی
أینک ، أینک ، یصبی عینی ، أینک ، أینک ، شو ناسینی
***
أنت حبیبی و أنا بهواک ، لا تبعد عنّی أترجّاک
إذکرنی او لتشمت إعدای ، مجنون إبحبّک یهوای
یل طورک غنّه إبدلالی ، یل صوتک یشفی لی أحوالی
أنت أحلامی و أنت ألغالی ، کلّمنی إعیونی إو هدّینی
أینک ، أینک ، یصبی عینی ، أینک ، أینک ، شو ناسینی
***
یا ورده او یا عطر الهیل ، و أحتاجک لو چل اللیل
ظلمه الدّنیا او گلبی إمدخّن ، حسراتک بگلیبی إتمحّن
یل روح العایش بل ریّه ، فوگ الدّنیا او صرت إعلیّه
إدخیل اللّه او لا تگطع بیّه ، ما أنام إفراگک یاذینی
أینک ، أینک ، یصبی عینی ، أینک ، أینک ، شو ناسینی
***
تعبان إو سهران إللیل ، نادیت إبحبّک یا ویل
أتصوّر حب او دفنیته ، او جسر إلی إیمدنه هاویته
وین إمحمّل یا دفّانی ، یا وسفه الشال إو عافانی
بردان او أرجف خلّانی ، دفّینی إبحبّک دفّینی
أینک ، أینک ، یصبی عینی ، أینک، أینک، شو ناسینی
***
یا گلبی العافک میعود ، ظل محزن بثیاب السود
أبچی إبسکته او سح الدمعه ، إبمای إعیونک طفّی الشمعه
ون ونه إبذکر إلأحباب ، إبهمساتک دگّیت الباب
جرحک ظل یدّی او ما طاب ، وینه إلواعدنی إیداوینی
أینک ، أینک ، یصبی عینی ، أینک ، أینک ، شو ناسینی
***
خبّلنی او ما چن حبّیته ، ناسینی إبمرضه او داویته
خاویته او گلبه الشرّانی ، و إبنار الفرگه او دوّانی
ما أتوبن من حب الجار ، إیجادلنی او یشعلنی إبنار
ما أریده إلیزهد خطّار ، إیصابحنی إبرمشه إیماسینی
أینک ، أینک ، یصبی عینی ، أینک ، أینک ، شو ناسینی
***
حرام علیک عایف ولفک ، إترجّیتک خل أشتم زلفک
یا عطر النسّم بل راس ، سکّرنی او زوّدنی إحساس
ودّعتک ما أظن أنساک ، أنت حبیبی أرید اویّاک
سامحنی لو گلبک شاک ، إشما أتبعک و أنت إمجافینی
أینک ، أینک ، یصبی عینی ، أینک ، أینک ، شو ناسینی
لا من طارش لا مرسال ، بغیابک دهورت الحال
مرّتنی أیّام إبهل غربه ، و إعیونی إعلی إصورّک تربه
عایش وحدی إبدونک صعبه ، منتظرک دوم إمخلّینی
***
د. جاسم محمد الحسّانی
15/03/1402 شمسل
16/ 11/ 1444 قمری
05/06/2023 میلادی
شعر عام (شعر شعبی)
تعليقات
إرسال تعليق