بقلم الشاعر/خالد جمال
بعشق
بعشق فيك رقة احساسك
ووفاءك يابني واخلاصك
وبدوب يا حبيبي ف كل ما فيك
من ساسك يا جميل ولراسك
بعشق ف عنيك سيل حنية
على خدك وردة مندية
أصل انا يا حبيبي ماليش بعديك
ولا يوم قبليك عشت الدنيا
بعشق ف جبين فيك بيلالي
وبيضوي كما البدر العالي
ده البدر محال ف النور يساويك
لو ليلة عايز فيها ليالي
بعشق ف الهوا شعرك طاير
وكمان بعشقه أحلى ضفاير
إن مسه الهوا بيقول مواويل
وسواد الليل منك غاير
بعشق ف الرمش اللي استولى
على قلبي ومن أول جولة
وسألته عليه قاموا ردوا عنيه
اتصادر بقى أملاك دولة
بعشق ف القد اللي معدي
بيقول ع الارض مفيش قدي
إن مدت كما لو خطوة خيل
والماشية لبطة أما تهدي
بعشق ف حبيبتي القمراية
والعشق مالوش عندي نهاية
كل اللي انا قلته عليها قليل
ده حبيبتي جمالها يا ناس آية
بعشق
بقلمي/ خالد جمال ١٤/٩/٢٠٢٥
تعليقات
إرسال تعليق