بقلم الشاعر /خالد جمال
صيد وشطارة
إزاي من بعد ما عشت سنين
واخد الأشواق صيد وشطارة
لا عرفت غرام ولا خدني حنين
والهوى كان شبكة وسنارة
دانا ياما شغلت بنات حلوين
سمر ودايبين بيض وقمارى
ولا كان يشغلني حبيب لو مين
لو وقعوا من العشق سكارى
معقولة أدوب من نظرة عين
طب قولي إزاي هاتلي أمارة
وتاخدني عنيك ماسألش لفين
وأبقى لمعاليك رهن إشارة
ويتوه كده عقلي ف غمضة عين
والروح تسألني ومحتارة
إزاي يأسرنا شهور وسنين
ويسيبنا مع الدمع سهارى
واعتب على عقلي وألوم ع العين
لا بكلمة يردوا ولا اشارة
واحاسب نفسي حساب ملكين
ليه خنتي العهد يا غدارة
مش كنا حلفنا يمين واتنين
لو شافنا العشق هندارى
ليه خدتي الروح لجراح وانين
ليه دايما بالسوء أمّارة
فترد النفس بلاش تفانين
مانت اللي عشقته وبحرارة
أيوه أنا بعترف انكو صادقين
وانا قلبي المحقوق بجدارة
يا حبيبي هواك حلالي سنين
نساني زمان عشته مرارة
أصل الهوى يابني مالوش قوانين
ولا عمره ما كان صيد وشطارة
لما بنعرفه بنقول آسفين
على عمر وضاع ألف خسارة
بقلمي/ خالد جمال ٣/١١/٢٠٢٥
تعليقات
إرسال تعليق