بقلم الشاعر /رضا عبد الحميد
رباعيات (حادثة الدقهلية)
الموت بقى مجاني والروح بقت ببلاش
سواق ماكانش في وعيه والسكه ماشيفهاش
شارب مسلطن دماغه بغيره مش مهتم
رمى الضحايا في الترعه وهوه مانزلهاش
***
ياعيوني جودى من دموعك نهر
على شباب بيموتوقبل مادفعو المهر
بغلطه من طايش لاعنده ضمير ولادين
بيت قلوب الدقهليه في ليله سوده وجمر
***
ضحايا من أسره واحده وضحايا متفرقين
ياأسطى انتا الصح وهما اللى غلطانين
همااللى لماشافوك ماكانوش قوى شايفين
وعشان ينولوالشهاده قامومعاك راكبين
***
سايق وحاطط على ودنك التليفون
واخد الطريق صاروخ بسرعة المجنون
كأن اللي راكبين معاك مش بشر ولا ارواح
كأنك محمل خشب اوورق كرتون
***
هوانتا عشان سواق لازم تكون واد خط
وتجري بالعربيه وتشيل فيها وتحط
وان حد نصحك وقالك هدى بقى السرعه
بتبقى عايز عليه تهجم اوام وتفط
***
نعيب عليك يا اسطى وللا على المسئول
اللى عملك رخصه اكيد دا كان مسطول
فين التحاليل والكشف ع الأعصاب
سحر الفلوس والرشاوى بينجح المشلول
***
ليه اكتر السواقين لازم يسبو الدين
ويشربو مخدرات ويكونو مش واعيين
ليه اكتر السواقين للصلاه تاركين
بجد على أخلاقهم من جوه قلبى حزين
***
ياسواقين الطرق خافو على الركاب
اللى معاك زي اخوك زي ابنك اومن الاصحاب
دافى التأنى السلامه والوصول بأمان
والسرعه فيها الخطر واللى تسرع خاب
***
يااسطى خاف ربنا وامشى بالأخلاق
خليك لنفسك قبل السواقه سواق
وبلاش شرب المخدر وخاف على الأرواح
ربك هيستر طريقك ويوسع الأرزاق
•••••
رثاء
شاعرالإحساس
تعليقات
إرسال تعليق