بقلم الشاعر/نبيل المصرى
الله يرحم أيام الجد...
كانت الدنيا حلوه بجد
كان يقول لى
خليك بشوش الوش
دلوقتى الناس بميت وش
والبياع بيغش
يحط الوحش تحت
والحلو على الوش
ويبيع لكل واحد بوش
الله يرحم أيام الجد
كان الجار للجار
دلوقتى ..
الجار يشوفك
يقفل الباب فى الوش
كانت الدنيا كلها سعاده
دلوقتى السعاده بتتباع فى ازازه
كان جدى بيشرب قازوزه
كانت الزجاجه بقرش
طعمها آخر لذاءه
وكان اللبن بوش
دلوقتى اللبن بيتغش
ياسلام على طمطمايه وشوية مش
ولا شوية عسل وطحينه
من عند ابو امينه
وشوية خلول
من عم زغلول
وطعميه من عم عطيه
ورغيفين من النمليه
والاعده على الطبليه
ولمة إخواتى حواليه
والضحكه مرسومه على الوش
وكان التلفزيون مؤدب
من غير دش
يقفل الساعه ١٢
ويقول وش
ولما ابوك يفتح الباب ويخش تجرى عليه
وتاخد منه احلى بوسه على الوش
هى دى السعاده بجد
الله يرحم ايام زمان
كانت الدنيا حلوه بجد
نبيل المصرى
تعليقات
إرسال تعليق