بقلم الشاعر/خالد جمال
مش عيب !!!
مش عيب على رمشه الفتّان
ليه راحله وقاله أنا ولهان
من بعد ما قلبي اطمن لِيه
ليه يبيعني ويطلع فتّان
مش عيب على ورده النعسان
ليه مال على خده وفيه زان
دانا كنت جايبله معايا بوكيه
ماعرفشي إن عليه بستان
بعتب على قده وزعلان
اخترتله أجمل فستان
بس الفستان مازبطش عليه
ماعرفشي إنه قوام غزلان
أنا بعتب على شعره كمان
بيطير ويفوتني أنا حيران
ده بدال ما يسيبني أبص عليه
مش كان علمني الطيران
مش عيب على ضي عليه بان
في جبينه بيضوي بألوان
الشمس إن شافت نوره تغيب
ومغطي على القمره كمان
مش عيب على فرط الرمان
فيه طارح ومالوهشي أوان
دانا قلبي بيحلم يوم يرويه
لو يسقوني غرام وحنان
مش بعتب علشان هجران
وبلوم على صد وحرمان
دانا بعتب قصدي أغازل فيه
دانا كل ما فيه بيه هيمان
بقلمي/ خالد جمال ١٢/١٠/٢٠٢٥
تعليقات
إرسال تعليق