بقلم الشاعر /خالد جمال
الخيانة
أيوه خنتك مش هغالط
أيوه كان فيه بينا تالت
بس فقت لنفسي لمّا
دمعة جوه عنيكي سالت
ذنبك إيه تبقي الضحية
تدفعي تمن الخطية
يكفي منك حتى بسمة
والحياة هتدب فيا
العيون ممكن تخون
بس قلبي محال يخون
أصله ماعشقشي إلا واحد
واستحالة عليه تهون
جاتني زي شيطان غوتني
تشكي شوق وتقول هوتني
كلمة منها بألف كلمة
بالخداع والزيف طوتني
قلبي صدَّق إنه صانّا
نار جهنم شافها جنة
والحنين كان نار بتحمى
يوم ما خانا وقل منا
خانِّي زي ما عشقي خانك
أيوه كان ده عقاب عشانك
كان مجرد طيف ونزوة
بس عمره ما خد مكانك
كت خيانتي واصمة إسمي
كت بعقلي مش بجسمي
بس عمري ما خنت قلبي
حد بعدك يوم لمسني
كل أملي إنك تسامحي
تنسي غدري ومر جرحي
قلبي راجع ليكي تايب
والندم تحكيه ملامحي
رغم خجلي من الخيانة
عرفتني مقام هوانا
وإن حبي ليكي أكبر
إنه يقبل يوم إهانة
الخيانة
بقلمي/ خالد جمال ٢٨/١٠/٢٠٢٥
تعليقات
إرسال تعليق