بقلم الشاعر/خالد جمال
سيب وانا اسيب
لو غالي كتير أوي على قلبي
لو جرحي بإيده أنا بيطيب
بتغني الروح لو كان جمبي
لو حتى ماليش بعده حبيب
لو بنسى معاه همي وكربي
والفرح الاقيه مني قريب
لو حتى خطاه ساكنة ف دربي
وإن سابني هعيش بعده غريب
قال جاي بسلامته يمهِّدلي
ويقوللي إن العشق نصيب
وبنبرة أسي يتنهدلي
وعنيه بتودي وبتجيب
قال يعني كلامه هيصدمني
وف لحظة عن الوعي هغيب
هتحمل هجره أنا بصعوبة
وهعجِّز في الحال وهشيب
وإن كنت بعيش برد ف طوبة
هلقى الأجواء حر أبيب
لو فكر يوم يخلى بحبي
لو يجرح في الشوق ويعيب
لو جه على قلبي وعذبني
مش هسأل فيه مهما يغيب
لو هدد قلبي إنه يسيبني
ما يسبب كده وانا برضه هسيب
الحب ماهوش ويل وندامة
وحبيب علشان نهواه نداديه
أو عاش ف قلوب ناس هدامة
غيتها تحارب فيه وتعاديه
ولا كان لحبيب شايفه قَيامة
ومفيش قبليه ولا فيه بعديه
لو قل معاك ألف سلامة
اياك تراضيه أو تسأل فيه
وإن باعك بيعه ولا ملامة
بكره الأيام هتحط عليه
ده الحب رخيص جمب كرامة
مهما الأشواق كت بتعليه
عيش كده ف الشوق مرفوع هامة
وإن قلبك هان دوس يابني عليه
ده القلب الحر كبير ياما
ولا عشق ف كل الكون يساويه
بقلمي/ خالد جمال ٢٧/١١/٢٠٢٥
تعليقات
إرسال تعليق