بقلم الأديبة /رضا العزايزة
#اتحضر_للاخضر ☘️🌿🌱🌳🌲🌾
(#عسلية #والحاج_فهيم )#بقلم/ #رضاالعزايزة
في هذه الأيام، ومع انطلاق #مؤتمر_المناخ، ذهبت "عسلية" لتسأل حماها "الحاج فهيم" عن طلبٍ كانت تريده.
قصدته في "المزرعه " حيث كان يجلس، ودار بينهما حوار طويل...
يلا بينا نعرف إيه اللي حصل بينهم:
🌹_عسلية: السلام عليكم يا أبا الحاج، عامل إيه؟
🌴_الحاج فهيم: وعليكم السلام يا عسلية.. ارغي، عايزة إيه يا عسلية؟!
🌹_عسلية: أنا لسه اتكلمت يا أبا الحاج!
(ضحكت عسلية لأن الحاج فهيم يفهمها جيداً).
🌹_عسلية: بقولك إيه يا أبا الحاج، كنت عايزة حاجة ومتقولش عليها "لأ" الله يرضى عليك. يا أبا فهيم انسَ إنك عمدة، وافتكر إنك عمي وحماي واللي مربيني أحسن تربية.
🌴_الحاج فهيم: إيه المقدمة الطويلة دي يا بت يا عسلية؟ اخلصي أنا مش فاضي لرغي الستات.
🌹_عسلية: عايزة تكييف، لحسن الأوضة عندي حر خالص، والناموس "بيغنى" في وداني وقطع جتتي، الله يكرمك يا أبا الحاج.
🌴_الحاج فهيم: تكييف إيه يا بت يا عسلية؟ !
مش الشباك عندك فيه سلك للناموس؟ وقلتلك ازرعي كام شجرة ريحان وشجر "النيّم" علشان الناموس، ولا إنتِ عشان اسمك عسلية يا بت بيتلموا عليكي؟ هههههههه.
يا بنتي مش شايفه المناخ عامل إيه؟ الحر مشكلة عالمية مش في أوضتك بس، والاحتباس الحراري على الناس كلها
والسبب هو الغازات المنبعثة والتلوث. الناس كلها بتتحضر للأخضر وعايزين يوفروا في الطاقة، وإنتِ تقولي تكييف!
🌹_عسلية: يعني يا أبا الحاج تكييف عسلية هو اللي هيبوظ المناخ؟ أنا قربت أسيح يا أبا فهيم، المروحة مش عاملة حاجة، ولسه هزرع شجر للناموس!
🌴_الحاج فهيم: تزرعي ليه يا بت؟ فكريني أجيب كام زرعة من المشتل ألفّهم حوالين البيت.
🌹_عسلية: وده إمتى يا أبا الحاج؟ قبل ولا بعد ما الناموس يأكلني والحر يقضي عليّ؟
وبعدين كل شوية أسمع يا أبا فهيم كلمة "كوب.. كوب"،
إلا إيه حكاية الـ COP ده اللي بيتكلموا عليه؟
🌴_الحاج فهيم: بصي يا بت يا عسلية، الحكاية إن الدول الكبيرة المتقدمة اللي عندها صناعات كتيرة خلت غاز الكربون يزيد خالص في الجو، لحد ما أثر على البيئة وعمل اختلال وعدم توازن في حرارة الكرة الأرضية.
🌹_عسلية: يعني هما يبقوا أغنياء ومتقدمين على حساب الغلابة، ولما ربنا يكرمنا وعايزين نبقى زيهم يقولك المناخ وأبصر إيه؟ مين بقى اللي هيدفع تمن الليلة دي يا أبا الحاج؟ عسلية الغلبانة اللي عايزة تكييف في أوضتها القبلية؟ يعني هي الدول المتقدمة هتبص لي في التكييف؟ يلا ربنا يسهلهم وبلاش إحنا!
🌴_الحاج فهيم: ما تهدي يا عسلية، مش لازم نقلل الاستهلاك ونشارك في حل المشكلة؟
قومي بلاش دلع، اطفي النور وشيلي أي حاجة تعمل "تخمر" في الأرض والغيط علشان مطلعش غازات، غاز "الميثان" أخطر تلاتين مرة من الكربون والسخام ده، والغازات الدافئة هي السبب في الاحتباس الحراري.. ربنا يلطف بعباده، قومي يا بت.
🌹_عسلية: استنى كدة يا عم الحاج، إيه الغازات الدافية دي؟
🌴_الحاج فهيم: ما هي دي يا بت يا عسلية سبب المشكلة، لأن الغازات دي سبب ارتفاع درجات حرارة الأرض. طبعاً الحرارة هتعمل تبخر ويزيد بخار الميه، وغاز ثاني أكسيد الكربون، وغاز الميثان، وغاز أكسيد النيتروز.. وهتقل الموارد الغذائية كلها سواء زرع ولا غيره، كله بسبب التلوث والاحتباس الحراري اللي سببه الإنسان، عارفة اسمهم العلمي إيه يا عسلية؟ Global Warming.
🌹_عسلية: هعرف منين يا أبا الحاج فهيم؟
أنت اللي قاعد تسمع النشرة ليل نهار وعامل غرفة معيشة في "جوجل". إحنا هنعمل هاشتاج نسميه "اسأل الحاج فهيم" بدل ما تسأل جوجل هههههه.
🌴_الحاج فهيم: ضحكتيني يا بت يا عسلية يا سكر أنتِ.. علشان كدة هبطل أزرع رز، قولتي لي ليه يا عسلية؟
🌹_عسلية: ليه يا أبا جوجل؟ هههه.
🌴_الحاج فهيم: علشان "تخمر" الأرض بيبقى عالي في زراعة الرز. فكريني كمان نزود الشجر، ونلم بواقي الحيوانات وأي مخلفات ندفنها في الأرض، وبرضه عايزين نحول كل حاجة في الأرض للطاقة الشمسية علشان التلوث.
🌹_عسلية: لا إله إلا الله! ناقص تتكلم عن "الوقود الأحفوري" يا أبا فهيم! يعني هو أنا فكرتك يا أبا الحاج؟
هو إحنا اللي هنبدأ نحل مشاكل المناخ من العزبة عندنا؟
يا ريتني طلبت تكييف من "جوجل" والله ما كان هيطلب كل الطلبات دي مني!
🌴_الحاج فهيم: مش لازم نبدأ بنفسنا يا بت يا عسلية؟ و"نتحضر للأخضر" علشان الزرع ميقلش.
كل واحد مستني غيره يبدأ؟ إيه السلبية دي يا بت!
🌹_عسلية: شكل "#اتحضر_للأخضر" هييجي على دماغ عسلية، من يومي حظي قليل. خلاص هنقضيها أكل سمك يا أبا الحاج طالما الزرع هيقل، حتى الفسفور يعلي الذكاء و"الأوميجا 3"، لحسن دماغي خلاص بقت مسطحات مائية باين الموضوع كبير!
🌴_الحاج فهيم: حتى السمك يا بت هيقل، عارفة ليه؟ لما درجة الحرارة تزيد، القطب الجليدي هيسيح وده ميه عذبة، هتصب فين؟ في البحار والمحيطات، فتخف الملوحة وتزيد الحموضة وتزيد الغازات الدافئة، وتقل الثروة السمكية.
🌹_عسلية: يعني السمك "فرهد" من الحر ومستكتر عليا تكييف؟ يعني الزرع هيقل والسمك هيقل ويحصل فيضانات وسيول؟ ده على كدة الناس هتاكل بعضها! استر يا رب.. والحل إيه يا أبا الحاج فهيم؟
🌴_الحاج فهيم: نكتر من الزراعة، ونقلل من التلوث، ونعمل "إعادة تدوير" لكل حاجة، ونعتمد على الطاقة النظيفة زي الشمس والرياح. ده عملوا أجهزة يا عسلية تمتص غاز ثاني أكسيد الكربون من الجو، لأن التلوث لعب في "دورة الكربون" وعمل الاحتباس الحراري.
🌹_عسلية: يا لهوي ياني! يا ريتني ما سألتك يا أبا الحاج، دماغي "زنت"، الله يسامحك يا أبا فهيم!
(وفجأة دخل زوج عسلية وهي تقوم بربط رأسها لأنها شعرت بالدوار).
💚_الزوج: مالك يا بت يا عسلية في إيه؟
🌹_عسلية: مفيش حاجة يا أخويا، هطلع فوق السطوح أنتف ريش الديك الرومي وأعمل "هواية صديقة للبيئة" أهوي بيها على نفسي من الحر علشان "#أتحضر_للأخضر"، سيبني في حالي الله يرضى عليك!
💚_الزوج: مالها البت عسلية يا أبا الحاج؟
🌴الحاج فهيم (ضاحكاً): سيبك منها، شوية وهتنسى موضوع التكييف اللي كانت عايزاه.
🥰(وظل يضحك هو وابنه على خفة دم عسلية)😉😆
تعليقات
إرسال تعليق